БИШКЕК, 29-июн. — Sputnik. Бүгүнкү күндө Саламаттык сактоо министрлигинин айрым алгоритмдери өзгөрдү. Ага ылайык, эгерде жарандын дене табы 38 градустан ашып, пневмониянын белгилери байкалса, ал ПЦР-тесттин жыйынтыгын күтпөстөн, атайын даярдалган ооруканага кабыл алынат. Бул тууралуу министрдин орун басары Нурболот Үсөнбаев брифингде билдирди.
Анын айтымында, оор абалда кайрылган жарандардын саны көбөйүүдө.
"Кайрылган сыркоолор ооруканага жаткырылгандан кийин алардын коронавируска чалдыккан же чалдыкпаганына изилдөө жүргүзөбүз", — деди Үсөнбаев.
Ал ошондой эле бир катар медициналык мекемелерде кырдаалга байланыштуу коронавирус менен ооруган бейтаптарга кошумча орундар ачылганын кошумчалайт.
Боронов Кыргызстандын азыркы эпидемиялык абалга жеткен себебин айтты
Министрдин орун басары жарандарды бейтапканаларга чалып, дарыгерлерден кеңеш алып, ошол боюнча дарыланууга чакырды.
Кыргызстанда 29-июнга карата COVID-19 жуктургандардын жалпы саны 5 017ге жетти. Анын ичинен 2 294 жаран сакайып чыкса, 50 адам каза болгон.
