БИШКЕК, 29-июн. — Sputnik. Жакында эле көпчүлүк жарандарыбыз вирус жок деген жалган маалыматка ишенип, адамдар көп жыйналган жерлерге барып жүргөнү биз күрөшүп жаткан бүгүнкү абалга алып келди. Премьер-министр Кубатбек Бороновдун өкмөттүн жыйынындагы бул айткандарын анын маалымат кызматынан кабарлашты.
Өкмөт башчы азыр дагы адистердин сөзүн угуп, өтө зарыл болбосо үйдөн чыкпай туруу кеч эместигин айтып, элди сабырдуулукка чакырган.
"Көпчүлүк вирус жок деген жалган маалыматка ишенип, адамдар көп жыйналган жерлерге барып жүрүштү. Дал ушул нерсе бүгүнкү биз күрөшүп жаткан абалга алып келди. Бирок азыр дагы адистердин сөзүн угуп, өтө зарыл болбосо үйдөн чыкпай турууга кеч эмес. Бул айрыкча жашы улгайган, тобокелдик жогору зонадагы жарандарга тийиштүү. Эң башкысы — дүрбөлөңгө түшпөө керек. Дүрбөлөңгө түшүү коркуу сезимин жаратып, башаламандыкка алып келет. Ошондуктан мен жарандарыбызды сабырдуулукту сактоого жана чыдамкайлыкка чакырам", — деген өкмөт башчы.
Ал вирустук инфекциянын биринчи белгилери аныкталган учурда дарыгерлердин талаптарын так аткаруу зарылдыгын кошумчалаган.
Соңку маалымат боюнча, Кыргызстанда коронавируска кабылгандардын саны 5 017ге жетти. Анын ичинен 2 294 бейтап айыгып, тилекке каршы, 50 адам ажал тапты.
Бишкек медиктерге муктаж! Мэрия дарыгерлердин жардамга келишин суранууда
