БИШКЕК, 27-июн. — Sputnik. Белгилүү кинорежиссер Бакыт Карагулов көз жумду. Кабарды Кинематографисттер союзунун катчысы Талант Төлөбеков тастыктады.
Анын айтымында, режиссер үч күн мурун жөтөлүп, дене табы көтөрүлүп ооруканага түшкөн.
Карагулов 1950-жылы 12-августта Фрунзеде төрөлгөн. Түбү Таластан. Ал режиссер катары "Куш өмүр" ("Бетме-бет" чыгармасынын негизинде), "Найман эненин ыйы" же "Маңкурт", "Бороондуу бекет" жана башка тасмаларды тарткан. Ага КРдин эл артисти наамы ыйгарылган.
