БИШКЕК, 12-май - Sputnik. Кыргызстандын 50гө чукул жараны Москвадагы Большая Ордынка көчөсүнө чогулуп, мекенине жөнөтүүнү талап кылды. Бул туурасында РИА Новости кабарлады.
Эскерте кетсек, бул жерде Кыргызстандын Россиядагы элчилигинин имараты жайгашкан.
Посмотреть эту публикацию в Instagram
"Чогулгандардын бир катарлары РИА Новостинин кабарчысына жашаганга каражатсыз, баш калкаларга турак жайсыз калганын айтышты. Ал арада элчилик карантинге жабылган", — деп айтылат маалыматта.
Абалды 20га чукул гвардиячылар көзөмөлдөп, чогулгандарды коронавирустан улам аралыкты сактоого чакырып жатканы кабарланды.
Россия пандемиядан улам 27-марттан тарта адаттагы жана чартердик рейстерди башка өлкөлөргө учурууну токтоткон. Сырттан элди ташып келген, жүк салынган, гуманитардык же санитардык гана каттамдар аткарылууда.
Кыргызстан чет жактагы жарандарды алып келүү боюнча иштер мүмкүнчүлүккө жараша жасалып жатканын ТИМ жетекчиси Чыңгыз Айдарбеков бүгүнкү брифингде билдирген. Ал келерки жумаларда сырттан 1000ге чукул кыргызстандык, анын ичинен Москва шаарынан 402 жаран алып келинерин айткан.
