БИШКЕК, 24-апр. — Sputnik. Үйдөгү зордук-зомбулуктун көбөйүшүнө байланыштуу кризистик борборлорду ачуу маселесин карап жатабыз. Бул тууралуу Бишкек шаарынын коменданты Алмаз Орозалиев брифинг учурунда билдирди.
Анын айтымында, былтыркыга караганда быйыл үйдөгү зордук-зомбулуктун саны 62 пайызга өскөн.
"2019-жылдын 24-мартынан 24-апрелине чейин 100 факты катталса, быйыл ушул эле маалда 162 факты болду. Урматтуу, шаар тургандары! Бул убакыт дагы өтөт. Үй-бүлөбүздү сактап, жакындарыбызга сабырдуу болушубуз керек", — деди Орозалиев.
Ал ачыла турчу кризистик борборлордо адам көп болорун, бирок бардык санитардык-эпидемиялык эрежелер сакталарын кошумчалады.
"Биз бул борборлордун жана анда жашагандардын коопсуздугун камсыздоого даярбыз", — деди комендант.
Эске салсак, буга чейин адистер Кыргызстанда коронавирустун жогорку чеги 20-24-апрелге туура келерин боолголошкон.
Кыргызстанда коронавирус жуктуруп алгандардын саны 656 болсо, анын 322си айыкты. Илдеттен сегиз адам көз жумду.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Sputnik редакциясы карантин учурунда ар тараптан жардам бере турган кызматтардын ишеним телефондорун жана облустардагы комендатура, штабдардын номерлерин жарыялаган.
Кабарларды ыкчам, ыңгайлуу шартта окуу үчүн Telegram каналыбызга баш багыңыз.
