БИШКЕК, 10-апр. — Sputnik. Почта кызматкерлери пенсия, жөлөк пулдан комиссияны Улуттук банктын токтомуна чейин кармашкан. Бул тууралуу "Кыргызпочтасы" ишканасынын маалымат кызматы билдирди.
Буга чейин Sputnik Кыргызстан агенттигине Ысык-Көл облусунун Түп районуна караштуу айылдардын биринин жашоочусу кайрылып, жөлөк пулдан почта кызматкери "комиссия" деп 100 сом кармап калганын жазган.
Эске салсак, Кыргызстандын банктарына картадан пенсия жана жөлөк пул акчасын чыгарып жаткан учурда комиссия алууга тыюу салынган. Мындай токтомду Улуттук банк кечээ, 9-апрель күнү, кечинде кабыл алган.
"Токтомго чейин "Кыргызпочтасы" ишканасы менен "Айылбанктын" ортосунда кардардын картасынан акча алганда 1 пайыз өлчөмүндө комиссия алынып калат деген келишим бар болчу. Ал бир пайыздын 0,6 пайызы почтага, 0,4 пайызы банкка калат. Сиздерге кайрылган жаран 10 000 миң сом өлчөмүндө жөлөк пул алган. Андан бир пайыз комиссия кармалганда 100 сом болот. Бизге азырынча комиссия алып калууга тыюу салган тапшырма келе элек. Бирок азыркы тапта бул маселе чечилип жатыптыр, келет болушу керек. Мындан улам эртеңден тарта жөлөк пул, пенсия тараткан почта кызматкерлери комиссия кармабайт", — деди ишкананын маалымат кызматы.
Буга чейин Эмгек жана социалдык өнүктүрүү министри Улукбек Кочкоров жөлөк пулдар өз убагында кечиктирилбей бериле турганын айткан.
