МОСКВА, 27-фев. — Sputnik. Советтер Союзунун карамагында болгон 70 жылдын ичинде Кыргызстанда билим берүү, илим, маданият жана өнөр жай укмуштуудай өнүккөнү талашсыз факт. Бул тууралуу президент Сооронбай Жээнбеков Кыргызстан менен Россиянын эриш-аркак жылынын ачылышына арналып Мамлекеттик Кремль сарайында өтүп жаткан гала-концертте айтты.
“Кыргызстан эгемендикке ээ болгонуна 30 жыл болду. Бирок буга карабастан эки элдин руханий, маданий, боордоштук мамилеси ошол боюнча калды”, — деди өлкө башчы өз сөзүндө.
Жээнбеков быйыл Улуу Жеңишке 75 жыл толорун да эскертип өттү.
“Адамзаттын тарыхындагы эң коркунучтуу согуш тууралуу чындыкты коргоп, аны кийинки муундарга өткөрүп берүү — биздин ыйык милдет. Ата-бабаларыбыздын эрдигин эч качан унутпайбыз. Советтик жоокердин кайраты дайым эсибизде болот. Согуш тууралуу чындыкты коргоодо Россиянын ролу эбегейсиз”, — деди Жээнбеков.
Кыргызстандын президенти Россия республиканын эң жакын, ишенимдүү союздашы жана узак мөөнөттүү стратегиялык өнөктөшү экенин белгиледи. Анын айтымында, интеграциялык жана аскерий-саясий уюмдардын (бул биринчи кезекте КМШ, ЕАЭБ, ЖККУ, ШКУ) курамындагы эки мамлекеттин позициясы бирдей.
