БИШКЕК, 7-фев. — Sputnik. Нарын облусунун жаңы түзүлгөн логотиби өкмөттүн сайтына жарыяланды.
"Нарын облусуна инвестиция тартууда, туризм тармагын өнүктүрүү иштеринде жана жергиликтүү продукцияларды чыгарууда колдонуу үчүн Нарын облусунун логотиби иштелип чыгып, ыйгарым укуктуу өкүл Эмилбек Алымкуловдун 3-февралдагы буйругу менен бекитилди. Облустун өзгөчөлүгүн чагылдырган логотипти мекеме-ишканаларга, туристтик фирмаларга, өндүрүштүк ишканаларга өзгөртпөстөн колдонуу жагы сунушталууда", — деп айтылат маалыматта.
Логотипте Теңир Тоонун койнундагы улуу Жибек Жолу, Таш-Рабат, Соң-Көл жана Нарын дарыясы сыяктуу облустун өзгөчө жерлери камтылган.
Сынакка беш адам катышып, Нарын шаарынын башкы архитектору Эркин Рахатбек уулу сунуштаган эмгек мыкты деп табылган.
Анткен менен социалдык тармактын колдонуучулары жаңы логотипти сынга алып, жагымсыз экенин айтышууда. Көптөр өңдөрдүн айкалышы начар болуп калганын белгилешкен.
"Өтө көп акценттер коюлуптур. Жазуусу Таш-Рабаттын аталышы жазылган шрифтке ыңгайлаштырылса оң болмок", — деди Ильзат Каримов.
Чынгыз Жаныбек аттуу колдонуучу логотип Microsoft Paint графикалык редактору аркылуу жасалган деп болжоп жатат.
"Кээ бирлер муну тамаша катары түшүнүп алышыптыр. Бул чын эле калжың эмеспи?" — деп суроо салды Yana Kulishova.
Анткен менен логотипти жактыргандар дагы болду.
