Аскарбек уулу: унааны техникалык кароодон өткөргөн мамлекеттик компания жок
Автомашиналарды техникалык кароодон өткөргөн компаниялардын ишмердүүлүгү талапка жооп берер-бербесин текшерүү Мамлекеттик экотехинспекциянын мойнунда. Бирок учурда мораторий киргизилгендигине байланыштуу биз аларды көзөмөлдөй албайбыз. Бул тууралуу Улан Аскарбек уулу Sputnik Кыргызстан радиосунун таңкы эфиринде маек куруп жатып билдирди.
Анын айтымында, унаалардын техникалык абалын текшерүүдөн өткөргөн бир дагы мамлекеттик компания жок.
"Транспорт коопсуздугу боюнча бөлүмдүн түзүлгөнүнө эки жыл болду. Биз жобо иштеп чыгып өз чарба иштерибизди бүтүргөнчө бир жыл өттү. Эми ишти баштап мамлекеттик мекемелердин автоунааларынын техникалык абалын, техникалык кароодон өткөргөн компанияларды текшерип баштаганыбызда өкмөт тарабынан эки жылга мораторий киргизилди. Ошентип экологиялык-техникалык көзөмөлдөн өткөргөн ишканалар жеке менчик катары эсептелип калды. Биздин аларды текшерүүгө укугубуз жок, бирок бул мораторий 2019-жыл менен соңуна чыгат. Анткени 2020-жылдан баштап ал компаниялар да ЕАЭБдин талаптарына жооп берген шартта иштеши керек. Республика боюнча 300дөн ашуун мындай мекеменин канчасы кандай абалда экенин азырынча билбейбиз. Жаңы жылдан баштап пландык текшерүүлөр башталат", — деди Аскарбек уулу.
Ал ошондой эле айдоочуларды автомашинага тетик сатып алууда сатуучулардан тастыктоочу бардык документтерин талап кылууга чакырды.
