БИШКЕК, 5-ноя. — Sputnik. Тергөө 2017-жылдын июль айында Филипп Киркоровдун концертине теракт даярдалган деген иш боюнча Алла Пугачева менен Максим Галкинди суракка алуудан баш тартты. Бул тууралуу "Коммерсант" жазды.
Фигуранттардын бири чынында теракт эмес, Киркоровду өлтүрүү аракети болгонун айтып, буйрукту Максим Галкин бергенин билдирген. Мындан улам чоң резонанс жаралган. Тергөө айыптап жаткан кишиге ишенбей, шоуменди керек болсо күбө катары дагы суракка алган эмес.
Алардын беш бомба даярдашканы болжолдонууда. Май айында эки бомба текшерүү максатында жардырылып, топтун мүчөлөрү жасалган каражаттар ишке жарай турганына көздөрү жеткен.
"Анткен менен алар пландаганын ишке ашыра албай калышкан. Себеби иш-чара башталганга чейин полиция кызматкерлеринен өтүп бомбаны концерт өтө турган жерге кое албай калышкан", — деп айтылат иштин материалында.
Айыпталуучулардын бири Хидирнеби Казуев теракт эмес, ырчы Филипп Киркоровду өлтүрүүгө аракет жасашканын билдирген. Ал мындай буйрукту Пугачеваны Киркоровдон кызганган Максим Галкин бергенин айткан.
Адвокат Исрафил Гададов эстраданын үч жылдызын тең күбө катары суракка алуу керектигин эки ирет сунуштаган. Бирок тергөө баш тартып койгон. Гададовдун айтымында, иш бир нече күн мурда сотко жиберилди. Алдын ала угууда жактоочулар кайрадан жылдыздарды суракка алуу маселесин көтөрүүнү пландап жатышат.
