БИШКЕК, 26-сен. — Sputnik. Премьер-министр Мухаммедкалый Абылгазиев өкмөт менен Centerra Gold Inc. компаниясынын ортосунда курчап турган чөйрөнү коргоо жана инвестицияларды өнүктүрүү боюнча стратегиялык келишимди ишке ашырууну талкуулаган кеңешме өткөрдү. Бул туурасында өкмөттүн маалымат кызматынан кабарлашты.
Өкмөттөгү жыйында аймактарды өнүктүрүү боюнча Социалдык өнөктөштүктү өнүктүрүү фондусунун жана Жаратылышты өнүктүрүү коомдук фондусунун акча каражатын пайдалануу механизми жана тартиби каралган.
"Эми келип түшүүчү акчаны жаратылышты коргоо жана атамекендик экономиканы өнүктүрүү үчүн пайдалангыдай механизмдерди иштеп чыгуу керек", — деди Абылгазиев.
Аймактарды өнүктүрүү боюнча социалдык өнөктөштүктү өнүктүрүү фондусунун маанилүү милдеттеринин бири ар кыл тармактагы жаңы ишканаларды түзүү жана учурдагыларын колдоо экени айтылды. Алар — облустардагы инновациялык технологияларга, жеңил жана тамак-аш өнөр жайына, айыл чарба продукциясын кайра иштетүүгө, жер-жерлерде инфратүзүмдөрдү өнүктүрүүгө багытталган ишканалар.
Жаратылышты өнүктүрүү фондусунун акчасы экологияны жакшыртуу, айлана-чөйрөнү коргоо жана жаратылыш байлыктарын сактоого багытталган долбоорлорду каржылоо үчүн колдонулары айтылды.
"Эки коомдук фондуга бөлүнгөн акча бекитилген багыттарга гана жумшалышы керек. Бул процесстерди өкмөт жана коомчулук көзөмөлдөйт. Жаратылышты коргоо жана аймактарды өнүктүрүү боюнча кабыл алынган чараларды натыйжалуу ишке ашыруу үчүн бардыгы ачык жана айкын өтүшү зарыл. Масштабдуу жумуштардын жыйынтыгы жарандардын күмөн саноосуна алып келбеш керек. Ошондуктан биз бардык процесстердин ачык-айкындуулугун камсыз кылып жана конструктивдүү ишке даяр болушубуз зарыл", — деген премьер-министр.
Эскерте кетсек, 2017-жылдын 11-сентябрында кыргыз өкмөтү менен "Centerra Gold Inc." компаниясы ортосунда айлана-чөйрөнү коргоо жана инвестицияларды өнүктүрүү боюнча Стратегиялык келишимге кол коюлган.
Стратегиялык келишим "Кумтөр" долбоорун ишке ашырууда экологиялык абалды жакшыртуу үчүн шарттарды түзөт. Документке ылайык, Centerra Gold Inc. компаниясы жаратылышты коргоо, биринчи кезекте Ысык-Көл акваториясынын жаратылышын коргоо иш-чараларын каржылоону кеңейтүүгө багытталган жаңы милдеттенмелерди алат.
Биздин Telegram-каналга жазылыңыз.
