БИШКЕК, 25-июл. — Sputnik. Мурдагы президент Алмазбек Атамбаевдин Россиянын президенти Владимир Путин менен болгон жолугушуусу тууралуу кеңешчиси Кундуз Жолдубаева маалымат берди.
Анын айтымында, Атамбаев менен Путин Кыргызстандагы кырдаал жана саясий туруктулук боюнча боюнча сүйлөшкөн. Бул үчүн конфликтиге барып жаткан эки тарап тең аракет жасашы керектиги айтылган.
View this post on Instagram
"Пикир алышуу үчүн абдан жакшы мүмкүнчүлүк болду. Жогорку деңгээлдеги жолугушууну уюштургандарга ыраазымын. Россия дагы бир жолу Кыргызстандын стратегиялык өнөктөшү жана досу экенин тастыктады. Бирок ички маселелерди биз өзүбүз чечебиз", — деген Атамбаев.
Ошондой эле ал азыркы бийлик укуктук талаага кайтып келиши керектигин белгилеген.
"Бийлик оппоненттерине саясий куугунтук кылууну токтотуп, соттук иштерди кароодо өзүнүн объективдүүлүгүн көрсөтүшү абзел. Биз шайлоого эч тоскоолдуксуз даярдык көрүүгө мүмкүнчүлүк алышыбыз керек. Жээнбеков ушундай кадамдарга барса, оппозициясынын пландары дароо өзгөрөт. Саясий чыңалуулар да басаңдайт. Биз дагы Кыргызстандын келечеги үчүн ага ынтызарбыз", — деди Атамбаев.
Мурунку өлкө башчысы бийлик өлкө үчүн керектелген долбоорлор менен алектенсе, жан дили менен ага жардам берүүгө даяр экенин айткан.
"Ошондо гана Кыргызстандын жарандары президент Жээнбеков өлкөнүн жыргалчылыгы үчүн иштеп жатканын көрөт. Ал эми оппозиция шайлоого даярданып, эл тынчтанып, саясий туруктуулук орнойт. Бул тууралуу Владимир Владимирович менен да сүйлөштүк. Биз 3-июлдагы митингде айткандай эле бийликтин конкреттүү кадамдарын сентябрга чейин күтөбүз", — деп сөзүн жыйынтыктаган Атамбаев.
Эске салсак, Атамбаев 24-июлда Канттагы авиабаза аркылуу атайын учак менен Москвага учуп кеткен. Кийинчерээк анын Кремлде Россиянын президенти Владимир Путин менен жолукканы белгилүү болду.
Мурдагы президентти КСДП төрайымынын милдетин аткаруучу, ЖК депутаты Асел Кодуранова, КСДПнын төрагасынын орун басары, ЖК депутаты Мурадил Мадеминов жана Ирина Карамушкина, ошондой эле кеңешчиси Кундуз Жолдубаева менен КСДПнын расмий өкүлү Темирлан Султанбеков коштоп барган.
Алмазбек Атамбаев 25-июлда кечинде кайтып келерин билдирген.
