Эхинококкоз, альвеококкоз оорусу менен ооругандардын 20 пайыздан ашыгын 14 жашка чейинки балдар түзөт. Бул тууралуу Жумагүл Усубалиева Sputnik Кыргызстан радиосунун таңкы эфиринде маек куруп жатып билдирди.
Анын айтымында, көп адамдар бул оорунун бар экенин билишпейт.
"Эхинококкоз оорусу акыркы он жылда республикада эң актуалдуу маселелердин бири. Бул оорунун эки түрү болот, бир камерлүү жана көп камерлүү. Анын көп камерлүүсү альвеококкоз деп аталат. Эң өкүнүчтүүсү — мындай дартка ар кандай курактагы адамдар чалдыгат. Алардын ичинен 14 жашка чейинки балдардын саны ооруга чалдыккандардын 20 пайыздан ашыгын түзөт. Мындай көрсөткүч өлкөдө аталган оору боюнча эпидемиологиялык кырдаал курч дегенди түшүндүрөт. 2018-жылы 906 адам операция жолу менен дарыланган. Алардын ичинен 121 киши альвеококкоз менен оорудү. Курч кырдаалды төмөндөтүү максатында биз ветеринардык кызматкерлер, ден соолук комитеттери, жергиликтүү тургундар менен иш алып барып жатабыз",— деди Усубалиева.
Ошондой эле ал жылдын-жылга аталган оору менен кайрылгандардын саны көбөйүп жатканын кошумчалады.
