БИШКЕК, 15-май — Sputnik. Улуттук коопсуздук боюнча мамлекеттик комитеттин төрагасы Идрис Кадыркулов отставкага кетти. Бул тууралуу аталган мекеменин маалымат кызматы билдирди.
УКМКнын жетекчисинин кызматтан кетишине жакынкы учурда коомдо талкууланып жаткан паспорт чыры себеп болгону айтылды.
"Акыркы кездерде жергиликтүү ЖМКларда, өзгөчө бейөкмөт уюмдар тарабынан "УКМК Мамлекеттик каттоо кызматынын биометрикалык паспорттордун бланкасын сатып алууга байланышкан териштирүүлөрүн туура эмес карады" деп айыпталып келет. Ошондой эле бул иш боюнча менин кызыкчылыгым бар экени айтылууда", — деп Кадыркуловдун сөзүн келтирди маалымат кызматы.
Ошондой эле ал буга чейин комитет бир нече жолу Мамкаттоонун айрым кызматкерлери иш абалынан аша чаап, жеке кызыкчылыгы үчүн иштегени далилденген база бар экенин айтканын кошумчалаган.
Төрага аталган иш боюнча "өзүнүн кызыкчылыгы бар" деген коомчулуктун эки анжы оюн эске алуу менен УКМКнын жетекчилигинен кетүү чечимин кабыл алганы жана бул тууралуу президентке рапорт жөнөткөнү айтылды.
Белгилей кетсек, Идрис Кадыркулов 2018-жылдын апрель айында УКМКнын төрагасы болуп дайындалган.
