БИШКЕК, 22-апр. — Sputnik. Президент Сооронбай Жээнбеков Ош шаарында өтүп жаткан "Санарип Кыргызстан: региондорду өнүктүрүү" аттуу I телекоммуникациялык форумга катышты. Бул тууралуу мамлекет башчынын маалымат кызматы билдирди.
Жээнбеков башка мамлекеттерден артта калбай, заманбап коомду куруп, глобалдуу санарип экономикасында өз ордубузду табуу керектигин белгиледи.
"Санариптештирүү боюнча өлкөбүздү биздин региондогу алдыӊкы орунга алып чыгуу максатын койдук. Эӊ татаал, көп түйшүктү, убакытты талап кылган көйгөй ушул. Мындай тарыхый мүмкүнчүлүк бир келет. Бул максатка жетпесек, санарип дүйнөсү биз үчүн жабык бойдон калат. Жакынкы келечекте экономиканы санариптештирүү аракети төмөнкү үч приоритеттүү багытта жүргүзүлөт", — деди ал.
Өлкө башчысынын айтымында, үч багыт төмөнкүдөй:
Биринчи. Бизнес-процесстерди, өндүрүш байланыштарын санариптик трансформациялоо;
- финансы жана банк секторуна инновацияларды киргизүү;
- компетенттүү адистер менен камсыз кылуу, атамекендик компаниялардын ишинин майнабын арттыруу, атаандаштыкка жөндөмдүүлүгүн көтөрүү;
- экономиканын артыкчылыктуу тармактарында санариптик инфраструктураны жана санариптик платформаларды өнүктүрүү.
Экинчи. Өнөктөш-өлкөлөрдүн санарип экономиканы өнүктүрүү боюнча стратегияларын пайдалануу;
- "Евразиялык экономикалык биримдиктин 2025 санарип күн тартибин" колдонуу;
- "Бир алкак — бир жол" программасы аркылуу санарип Жибек Жолун кайра жандандыруу жана регионалдык санариптик инфраструктураны өнүктүрүү боюнча эл аралык дагы башка демилгелерди колдоо.
Үчүнчү. Санарип технологияларын өнүктүрүү, аларды иштеп чыгууда тоскоолдуктарды азайтуу.
