БИШКЕК, 22-апр. — Sputnik. Өзбекстандын президенти Шавкат Мирзиёевдин улуу кызы, Маалымат жана массалык коммуникация боюнча агенттиктин директорунун орун басары Саида Мирзиёева Facebook баракчасы аркылуу өлкөнүн өнүгүүсү боюнча талкуу жүргүзүүнү сунуштады. Бул тууралуу Sputnik Өзбекстан жазды.
Ал Бука районунда Шавкат Мирзиёевдин беш демилгесин ишке ашыруу боюнча процесске катышканын белгиледи.
Аталган районго барганда Мирзиёева руханий-агартуу борборлорунда жүрүп жаткан курулуш иштери менен таанышкан.
"Президенттин демилгелеринин өзөгү — мектептерди куруу. Менимче, мектеп өлкө башчынын беш демилгесинин негизи болгон — маданият, агартуучулук, спорт жана компьютердик технологиялардын башаты. Бул тууралуу сиздердин ой-пикир жана сунуштарды билгим келет", — деди ал.
Эске салсак, Өзбекстан президентинин беш демилгеси өзүнө жаштарды искусствого кызыктырууну, ден соолугун чыңдоону, жан дүйнөсүн байытууну, китеп окууга үгүттөөнү, компьютердик сабатсыздыкты жоюу жана аялдарга жумуш орундарын түзүүнү камтыйт.
