Алматыда өтүп жаткан Дүйнөлүк этноспорт конфедерациясынын форумунда көк бөрү оюнунун эрежесинен тай казанды алуу маселеси кайрадан көтөрүлдү. Ал форумга Кыргызстандан Максат Чакиев катышып жатат. Sputnik Кыргызстан агенттигинин кабарчысы аны менен байланышып, талкууланган маселелер тууралуу сурады.
Чакиевдин айтымында, форумду Дүйнөлүк этноспорт конфедерациясы Казакстан менен биргеликте өткөрүп жатат. Ага аталган конфедерациянын президенти Билал Эрдоган жана 30га чукул өлкөдөн келген өкүлдөр катышууда.
"Бул жерде эки маселе каралууда, биринчиси — улуттук оюндарды өнүктүрүү, экинчиси — Түркияда өтө турган IV Дүйнөлүк көчмөндөр оюндарына даярдык. Анын ичинде көк бөрү орчундуу маселе катары турат. Дүйнөлүк көк бөрү федерациясы Түркияга тай казанды алып салууну сунуштады. Кыргызстандын атынан жалгыз өзүм каршы чыгып, Көчмөндөр оюндарын биз негиздегенден кийин Кыргызстандын эрежеси менен өтсүн деп сурандым. Азыр кагаз түрүндө дагы даярдап тапшырабыз. Кандай жыйынтык болорун айта албайм, расмий түрдө да, мындай да сүйлөшүүлөр болуп жатат", — деди Чакиев.
Ошондой эле уюштуруучулар форумга Кыргызстанды да чакырганын белгилеп, эмнегедир өлкөдөн эч ким барбаганын айтты.
Форум 20-21-апрель күндөрү өтүүдө. Ага Африка, Европа, Азия өлкөлөрүнөн өкүлдөр келген. Ал эми Чакиевди уюштуруучулар, Дүйнөлүк этноспорт конфедерациясы чакырган.
Кыргызстандын Көк бөрү федерациясынын президенти Искендер Кадыркулов мурунку жумада Алматыга барып келген. Ал эми бул форумга расмий чакыруу алган эмес. Бул туурасында федерациянын баш катчысы Куватбек Аскарбеков билдирди.
Посмотреть эту публикацию в Instagram
"Казакстандын Улуттук спорт федерациясынын президенти Бекболат Тилеухан Искендер Кадыркуловду кызматка дайындалышы менен куттуктап, таанышуу иретинде чакырган. Ал өткөн жумада Алматыга барып келген. Таанышуу иретинде гана жолугушуу болду. Жумуш тууралуу маселе талкууланган жок", — деди Аскарбеков.
Эскерте кетсек, 14-февралда Астанада Дүйнөлүк көк бөрү федерациясынын жыйыны өтүп, ага 9 өлкө катышкан. Анда тай казансыз, муляж менен ойноого ыктаган көкпар оюнунун талаптары эл аралык эреже катары кабыл алынган. Кыргызстандан расмий өкүл барган эмес. Бирок кыргыз тарап эрежеден тай казанды алууга каршы туруп келет.
