БИШКЕК, 9-апр. — Sputnik. Бишкекте коомдук жана саясий ишмер, бел боо күрөшүнүн түптөөчүсү Баяман Эркинбаевдин жаркын элесине арналган алыш күрөшү боюнча эл аралык Гран-При турнири өтөт. Бул туурасында Жаштар иши, дене тарбия жана спорт агенттигинен кабарлашты.
Маалыматка ылайык, мелдеш 27-апрелде "Газпром" ден соолукту чыңдоо борборунда болот. Ага эркектер жана кыз-келиндер Бириккен күрөш уюмунун эрежеси менен күч сынашат.
Салмактык категориялары:
— Эркектер (классикалык стиль): 60 кг, 70 кг, 80 кг, 90 кг, 100 кг, +100 кг;
— Кыз-келиндер (эркин стиль): 55 кг, 60 кг, 65 кг, 70 кг, 75 кг, +75 кг.
Баяман Эркинбаев убагында Жогорку Кеңештин үч жолку депутаты, эл аралык "Алыш" федерациясынын, "Палван" кайрымдуулук фондусунун негиздөөчүсү болгон. Кыргыз күрөшү боюнча Кыргызстандын жана Орто Азиянын 15 жолку чемпиону, эл аралык мелдештердин жеңүүчүсү аталган.
