БИШКЕК, 29-мар. — Sputnik. Кыргыздар катышкан Camel Fest этнофестивалын дүйнө боюнча 2,5 миллиард адам көрдү. Бул туурасында уюштуруучу, Этнооюндар конфедерациясынын президенти Аскат Акибаев билдирди.
Анын айтымында, иш-чара учурда да жалпыга маалымдоо каражаттарында көрсөтүлүп жатат. Фестивалды 1500 маалымат булактары чагылдырган.
"Жалпылап киришсек, элдердин маданий жана тарыхый баалуулуктарын сактап эле калбастан, аны бүгүнкү күндүн ыргагы менен өнүктүрө да аларыбызга ишендик. 2, 5 миллиард адам бул дүйнө элинин 30 пайызын түзөт", — деди Акибаев.
Сауд Аравиясында кыргыздар "Көчмөндөр ааламы" фестивалын тартуулаган. Анын режиссеру Алтынбек Максутов фестивалдын ачылыш аземин көрүүгө 12 миң адам келгенин айтты.
Camel Fest фестивалы 9-23-март күндөрү Эр-Рияд шаарында өттү. Анда 98 мамлекеттин өкүлдөрү маданият жана спорт жаатында өнөрүн тартуулаган. Ага 2000дей кыргызстандык катышып, "Көчмөндөр ааламы" деп аталган этнофестивалын көрсөтүштү. Кыргызстандан барган делегацияга атайын 15 гектар жер берилип, ипподром, этнобазар жана көчмөндөр айылы курулган. Ошондой эле катышуучулардын тамак-ашы, жаткан жери беленделип, мал-жаны багылган. Кеткен чыгымдын баарын уюштуруучулар көтөрдү.
