БИШКЕК, 25-мар. — Sputnik. Сауд Аравия королу Салман ибн Абдул-Азиз Аль Сауд Кыргызстан менен достук мамилелерди жана эки тараптуу кызматташууну өркүндөтүү үчүн көтөрүлгөн демилгелерди колдоого даяр. Бул тууралуу ал КР премьер-министри Мухаммедкалый Абылгазиев менен жолугушуу учурунда айтты.
Өкмөттүн маалымат кызматынын билдирүүсү боюнча Абылгазиев аталган өлкөгө 23-мартта Camel Fest маданий иш-чарасынын жабылуу аземине катышуу үчүн барган.
Өкмөт башчы королго чакыруусу үчүн ыраазычылык билдирип, президенти Сооронбай Жээнбековдун саламын жолдоду.
Тараптар жолугушуунун жүрүшүндө эки жактуу кызматташуунун актуалдуу, анын ичинде соода-экономикалык, инвестициялык жана гуманитардык тармактардагы маселелерди талкуулашты. Премьер-министр Сауд Аравия Кыргызстандын маанилүү өнөктөшү экенин жана тышкы саясатында өзгөчө орду бар экенин белгилеп өттү.
"Бул күндөрү биздин өлкөнүн жарандары ажылыкка келип, эки ыйык жерди кыдырышууда. Ошону менен бирге Сауд Аравиядан келген туристтердин жыл сайын көбөйүп жатышы кубандырат, алар үчүн эшигибиз дайыма ачык", - деди Абылгазиев.
Мындан тышкары, премьер эки жактуу өз ара аракеттешүүнүн маанилүү багыттарынын бири катары соода-экономикалык жана инвестициялык кызматташууну өнүктүрүү жана чыңдоо экендигине токтолду. Анын айтымында, өлкөлөр экономикалык кызматташтык потенциалын толук кандуу пайдаланбай келишет.
Мындан тышкары, король соода-экономикалык чөйрөдөгү алакаларды өнүктүрүү артыкчылыгын колдоп, жооптуу мамлекеттик органдарга өз ара кызыкчылыктар маселелерин илгерилетүүнү камсыздоону тапшырды.
"Эки өлкөнүн мамлекеттик органдары бул маселе боюнча тыгыз кызматташууга тийиш. Инвестициялык кызматташууну бекемдөө үчүн мен тиешелүү тапшырмаларды берем. Мусулман коомчулугунда болуп жаткан маселелерди биз ар дайым колдоого тийишпиз. Биз боордош өлкөлөрдөн болуп саналабыз", — деди ал.
Король Camel Fest эл аралык этнофестивалын ийгиликтүү өткөрүүдөгү кыргыз тараптын зор салымын белгиледи.
