БИШКЕК, 5-мар. — Sputnik. Сауд Аравиядагы этнофестивалга Кыргызстандын Көк бөрү федерациясынын президенти катары Жыргалбек Саматов барат. Аталган маалыматты Sputnik Кыргызстан агенттигине экс-жетекчи өзү тастыктады.
Этнофестивалда Кыргызстандан барган 50 улакчы беш командага бөлүнүп, көргөзмө оюн тартуулашат. Алгач аргымактарды да Кыргызстандан алып баруу пландалган, кийинчерээк айрым маселелерден улам аттар Сауд Аравиядан алына турганы айтылды.
"Эл аралык федерациянын баш катчысы жана Кыргызстандын Көк бөрү федерациясынын атынан Сауд Аравияга мен бара жатам. Бейшембиге караган түнү жолго чыгабыз. Талас, Ысык-Көл, Чүй, Ош облустарынан бирден команда жана Баткен, Жалал-Абад, Нарын, Бишкек менен Ош шаарларынан экиден улакчы тандалып бир команда түзүлгөн. Жалпы жонунан айтканда оюнчулар Кыргызстандын бардык дубанынан чогултулду", — деди Саматов.
Бул боюнча жаңы шайланган президент Искендер Кадыркуловдун өзү менен байланышууга мүмкүн болгон жок. Ал эми "Түндүкэлектр" ишканасынын маалымат катчысы ага өкмөттөн сунуш келбегенин билдирди.
Эскерте кетсек, Camel Fest фестивалы 9-мартта башталып 23үнө чейин созулат. Анда 98 мамлекеттин өкүлдөрү маданият жана спорт жаатында талантын көрсөтөт. Ага катышууга кыргызстандыктарга эң көп — 2000дей квота бөлүнсө, башка мамлекеттерге 15-20дай адамга чакыруу жиберилген. Кыргызстандык делегация "Көчмөндөр ааламы" деп аталган этнофестивалын көрсөтүшөт. Кыргызстандыктар үчүн Сауд Аравияда 15 гектар жер берилип, учурда ипподром, этнобазар жана көчмөндөр айылы курулган. Ошондой эле катышуучулардын тамак-ашы, жаткан жери беленделип, мал-жаны багылуу болот. Кеткен чыгымдын баарын уюштуруучулар көтөрмөкчү.
