БИШКЕК, 12-фев. — Sputnik. Автоунааны ишеним кат менен сатып алгандар же машинасын экинчи тарапка ишеним кат менен саткандар Мамлекеттик каттоо кызматынын электрондук кызматтар порталына билдирүү калтырып, издеген кишилерин таба алат. Бул тууралуу Мамкаттоонун маалымат кызматы билдирди.
Эскерте кетсек, "Коопсуз шаар" долбоорунун алкагында жол эрежесин бузганда салынган айыптар автоунаа катталган кишиге келет.
Көлүктүн чыныгы ээсин табуу үчүн portal.srs.kg сайтына кирип, "Кызмат көрсөтүүлөр" бөлүмүнөн "Транспорт" деген жерин тандайсыз. Андан кийин "Транспорт каражатынын ээсин издөө" бөлүмүнө кирип, " Мен, автоунаанын ээси, ишеним кат боюнча автоунааны башкаруучу адамды издеп жатамын " же
"Мен автоунааны ишеним кат боюнча айдап жүрөм жана автоунаанын ээсин издеймин" деген вариантты тандайсыз. Андан соң " Издөө жөнүндө кулактандырууну кошуу " деген баскычты басып, тийиштүү маалыматтардын бардыгын жазасыз.
Маалыматтарды кошуу үчүн катталуунун кажети жок.
Белгилей кетсек, Кыргызстандын тарыхында биринчи жолу 12-февралдан тарта "Коопсуз шаар" долбоорунун алкагында Бишкек шаарынын 10 көчөсүнүн кесилишине коюлган фото-видеого тартуучу камералар иштей баштады. Ал эреже бузуунун жети түрүн каттоого алат.
