БИШКЕК, 24-дек. — Sputnik. Ош шаарында жол эрежесин бузган айдоочунун унаасына карай атылган огу кокустан жөө бараткан адамга тийди. Бул тууралуу ИИМдин маалымат кызматы кабарлады.
Билдирүүгө ылайык, окуя 23-декабрь күнү 18:00дөр чамасында болгон. Анда инспекторлор астыңкы айнектери караңгылатылган, арткы номери жок Mersedes C-320 үлгүсүндөгү унааны байкап калып токтотушкан. Бирок айдоочу Ош ЖКККББ кызматкерин качыра сүзүп, качып кеткен.
"Инспектордун шериги айдоочунун артынан кубалап токтотууга аракет кылган. Бирок Mersedes C-320 үлгүсүндөгү унаанын айдоочусу катуу айдап, каршы тилкеге чыгып качып жөнөгөн. Айдоочуга эскертүү берип инспектор эки жолу асманга ок чыгарган, бирок айдоочу токтогон эмес. Мыйзамга таянган лейтенант айласыздан дөңгөлөктү мээлеп аткан. Бирок ок унаанын кырына тийип, андан кайкып учуп жол жээгинде кетип бараткан жөө кишинин кулагына тийген", — деп жазылат маалыматта.
Жол эрежесин бузган адам убактылуу кармоочу жайга киргизилген. Ал буга чейин соттолгон 19 жаштагы Ош облусунун тургуну, уюшкан топтун мүчөсү катары каттоодо турган адам болуп чыкты.
Кармалган адамдын унаасынын алдыңкы номери жасалма болуп чыккан. Аталган факт боюнча Кылмыш-жаза кодексинин 341-беренеси боюнча иш козголгон.
Ал эми жол инспекторунун курал колдонушу боюнча ички иликтөө кызматы териштирүү баштады.
