БИШКЕК, 17-ноя. — Sputnik. Россиянын Мамлекеттик Думасынын экс-депутаты Леонид Маевский кечээ, 16-ноябрда камалды. Бул тууралуу маалымат Москванын жалпы юрисдикция сотунун сайтына жарыяланды.
"Коммерсант" басылмасы полицияга таянып, Маевский жана анын азырынча кармала элек үзөңгүлөштөрү 31-октябрдан 8-ноябрга чейин Москвадагы "Альфа-групп" жана А1 компанияларынын өкүлдөрүнөн 40 миллион доллар опузалап алышканын жазды. Эгер компания өкүлдөрү акча берүүдөн баш тартса, алардын айрым маалыматтарын таратып жиберебиз деп коркутушкан.
"14-ноябрда ишкерлерден түшкөн арыздан улам полиция РФ Кылмыш-жаза кодексинин 163-беренеси (опузалап акча алуу, 15 жылга чейин камалуу санкциясы) боюнча кылмыш ишин козгогон. Маевский бир күн өтпөй эле аталган факты боюнча кармалган. Буга чейин "Альфа-групп" компаниясы менен Леонид Маевскийдин ортосунда Воронеж облусунда өндүрүлгөн керамикага байланыштуу ири жаңжал чыккан", — деп жазылат маалыматта.
Холдинг басылманын маалыматын тастыктап, чындап эле Маевский тарабынан коркутуу болгонун, мындан улам укук коргоо органдарына кайрылганын айткан.
"Бул боюнча толук, объективдүү жана ар тараптуу иликтөө жүргүзүү үчүн укук коргоо органдарына көмөктөшүүгө даярбыз", — деп жазылат арызында.
Маевскийдин адамдары комментарий берүүдөн баш тартышты.
16-августта Бишкек шаарынын Биринчи май райондук соту Текебаев менен Чотоновду "Коррупция" беренеси боюнча айыптуу деп таап, ар бирин сегиз жылга эркинен ажыраткан. 2-октябрда Бишкек шаардык соту биринчи инстанциянын өкүмүн күчүндө калтырган.
Кийинчерээк Текебаев Жогорку Кеңештеги мандатынан кол жууган.
