БИШКЕК, 16-авг. — Sputnik. Бишкек шаарынын Биринчи Май райондук соту Жогорку Кеңештеги "Ата Мекен" фракциясынын лидери Өмүрбек Текебаевди да, мурдагы өзгөчө кырдаалдар министри Дүйшөн Чотоновду да сегиз жылга эркинен ажыратты.
Ошондой эле алардын үй мүлкү мамлекетке чегерилип, жаза мөөнөтү бүткөндөн кийин үч жыл мамлекеттик кызматтарда иштөөлөрүнө тыюу салынды.
Аталган каражат мурдагы өзгөчө кырдаалдар министри Дүйшөн Чотоновдун айылдаш таанышы, кийин көзү өтүп кеткен Талант Маматкеримов аркылуу алынганы тергөөдө айтылган.
Текебаев буга чейин сотто акыркы сөзүн сүйлөп жатып өзүнө жана Чотоновго козголгон кылмыш иши жасалмаланганын жана атайын буйрутма экенин айткан.
"Урматтуу сот бул жерде биз өзүбүздүн күнөөсүз экенибизди далилдегенге аракет кылбашыбыз керек. Аны мына сот, сиз далилдеп беришиңиз керек. Бирок ага карабастан биз өзүбүздүн ак экенибизди далилдегенге аракет кылдык. Бизге коюлуп жаткан айыптоолор жасалмаланган жана жалган экенин дагы бир жолу айткым келет", — деп билдирген Текебаев.
Азыр райондук соттун имаратынын алдына эл өкүлүнүн тарапташтары үстүлөрүнө кызыл футболка кийип, колдоруна "Соттон акыйкаттык талап кылабыз", "Сот эл алдында ачык болсун" деген транспаранттарды көтөрүп чогулуп турушат.
Андан сырткары, бүгүнкү сот процессине "ата мекенчи" азыркы жана мурдагы депутаттар — Аида Салянова, Каныбек Иманалиев, Алмамбет Шыкмаматов, Бахадыр Сулайманов, Болот Шер, Садык Шернияз, Наталья Никитенко, Асия Сасыкбаева жана башкалар дагы келишкен. Ошондой эле бир катар саясий ишмерлер дагы алардын катарында жүрөт.
