Толкун болот деңиздин күчтүү жери,
Толкундай бол, кыргыздын жигиттери.
Токсон-тогуз өнөрдүн ээси бол деп,
Тоолук эне төрөгөн сени, мени.
Бүгүнкү Бурадарды акын Байдылда Сарногоевдин кыргыз жигиттерине арнаган ыр саптарынан баштагым келди. Кечээ Словакиянын Трнава шаарында өтүп жаткан жаштар арасындагы күрөш боюнча дүйнө чемпионатында алдыңкы орундарды ээлешти. Анда кыргызстандык Эрбол Бакиров 63 килограмм салмак категориясы боюнча египеттик Хассан Ахмед Мохамед менен кармашып алтын медаль утту.
Ал эми балбан Акжол Махмудов коло байгенин ээси болду.
Кыргыздын жигиттери менин оюмча отуруп алып оозу менен орок оруп, ушак сүйлөбөй ушул балбандарыбыздай өлкөнүн келечегин ойлоп, элдин намысын коргогон эр азамат болушу керек.
Кечээ премьер-министр Абылгазиев шаар бийлигине жол куруу үчүн жер тилкесин берген Ырысбек Атажановго саат тапшырды. Шаар тургуну өзүнүн патриот экендигин жана бийликтин планына бут тоспой тургандыгын айтып 11 сотых жерин мэрияга белекке берген экен.
Дагы бир жакшы жаңылык. Белгилүү америкалык актриса жана ырчы Женнифер Лопес өзүнүн ырына бийлеген кыргызстандык Эрика менен Эдель Касеновалардын өнөрүн жактырып, Instagram баракчасынын Stories бөлүмүнө бийдин видеосун жүктөп, ыраазычылыгын билдирген.
"Тазалык" муниципалдык ишканасынын кызматкери Жеңишбек Касымов операция жолу менен боорун алмаштыруу үчүн Түркияга учуп кетти. Эсиңиздерге салсак, эки жыл мурун бишкектик хирургдар андан паразитти алып чыгууга аракет кылышканы менен майнап чыккан эмес, анткени ал кан-тамырларга кирип кеткен. Бейтапка боордун альвеококкозу деген диагноз коюлган. Ошондон бери ал дарынын жардамы менен жашап келет. Үстүбүздөгү жылдын башында Касымовдун боорун алмаштыруу үчүн каражат чогултула баштаган. Аман-эсен сакайып кетсин!
Өлкө башчыны ташыган биринчи бортту алмаштыруу боюнча президентке жана премьер-министрге сунуш киргизилди. Ошондой эле президентти ташыган авиакомпанияны күчтөндүрүү да каралып жатат.
Баса, Кыргызгидромет октябрга карата аба ырайынын божомолун да жарыялады.
Валюта наркы. Сомдун баасы долларга карата орто эсеп менен 69.01 (сатып алуу) жана 69.34(сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 46.00 сом, АИ-92 үлгүсүндөгү май 43.50 сом, ал эми дизель майы 44.80 сомдон сатылууда.
Соңку сөз. Жигитке жетимиш өнөр аздык кылат!
Ден соолук каалап, Таалайгүл Усенбаева.
