БИШКЕК, 8-сен. – Sputnik. Стамбул соту режиссер Али Авжини "Ойгонуу" деп аталган 2016-жылдын июль айында Түркияда төңкөрүш жасоо аракеттер туурасындагы тасмасы үчүн алты жылга эркинен ажыратуу чечимин чыгарды. Бул туурасында РИА Новости жазды.
Фильмде Түркиянын азыркы президенти Режеп Тайип Эрдогандын чыкыйына тапанча такалып турганы көрсөтүлгөн. Прокуратура Авжиге, Түркияда ишмердүүлүгүнө тыюу салынган Фетхуллах Гүлендин уюмуна мүчө деген айып таккан. Фемида өкүлдөрө фильмдеги бул фрагменттери менен режиссер мамлекеттин президентин билип туруп эле мазактаган дешкен.
Ага карата айтылган күнөөлөөгө макул болбогон Авжи аны толугу менен актоону талап кылган.
"Фильм эгерде төңкөрүш аракети ордунан чыгып кетсе эмне болот эле деген ойду берет. Мени Эрдоганга тапанча такалган сценаны тарттың деп күнөөлөп жатасыңар. Ар бир эле кишиден сурасаңар төңкөрүштүн максаты – Эрдоган болгондугун айтып берет. Муну президент өзү деле билет. Эгерде террорчулукту жайылтам десем, Эрдогандын дуба кылып эмес, качууга аракеттенип жаткан учурун бермекмин. Мен муну билип туруп бирөөгө чакырык катары жасаганымды далилдесеңер, түрмөгө өмүр бою отурууга макулмун", — деген ал.
Белгилей кетсек, 2016-жылы 16-июлда Түркиядагы бийликти басып алууга карата аскердик төңкөрүш жасоого аракеттер болгон. 240тан ашык киши каза болуп, 2 миңден ашык киши түрдүү жаракаттарды алган.
Расмий Анкара бул аракеттин артында дин аалымы Фетхуллах Гүлен турарын айтып, АКШдан аны экстрадициялоону талап кылган. Өз кезегинде дин аалымы ага эч кандай тиешеси жок экенин белгилеп, бардык айыптоолорду четке каккан.
