Кызыл жоолук Мадина, көңүлдөш болгон Элина. "Делбирим" киносунан 17 сүрөт
Кызыл жоолук Мадина, көңүлдөш болгон Элина. "Делбирим" киносунан 17 сүрөт
Sputnik Кыргызстан
Залкар жазуучу Чыңгыз Айтматовдун "Делбирим" повестинин негизинде экрандаштырылып жаткан тасма тартылып бүттү. Аталган кино картинаны кыргыз-өзбек киночулары... 25.08.2018, Sputnik Кыргызстан
Залкар жазуучу Чыңгыз Айтматовдун "Делбирим" повестинин негизинде экрандаштырылып жаткан тасма тартылып бүттү. Аталган кино картинаны кыргыз-өзбек киночулары биргелешип жаратты.
Тасманын негизги бөлүгү Өзбекстандын Ташкент жана Наманган шаарларында, акыркы эпизоддорду Кыргызстандын Балыкчы шаарында бир жарым айда тартылып бүттү. Бул туурасында Sputnik Кыргызстан агенттигине тасманын Кыргызстандагы продюсери Паризат Жакыпбекова билдирди.
"Фильмди Өзбекстандын президенти Шавкат Мирзиёев "Чыңгыз Айтматовдун 90 жылдыгын белгилөө" жөнүндөгү токтомуна киргизген. Мындан улам, картинанын чыгымдарынын басымдуу бөлүгүн өзбек тарап көтөрдү. Ал эми сценарийин Кыргызстандын Кино департаментинин көркөм кеңеши жактырып, колдоо көрсөттү. Калганын биздин продюсердик борбор каржылады. Эми техникалык бөлүгүнө дагы акча керектелет. Аны өкмөттөн сурап жатабыз, азырынча жооп келе элек", — деди Жакыпбекова.
Фильмдин сценарийинин автору — жазуучу Керез Зарлыкова. Ал буга чейин "Көпөлөк" жана "Кокуй кошуна" тасмаларынын сценарийин жазган. Режиссерлукту өзбекстандык Сарвар Каримов аркалоодо.
Ильястын ролун белгилүү актер Азиз Ражапов, Байтемирди Улугбек Кадыров ойноду. Эки актер тең Өзбекстандан. Аселдин образын Кыргыз улуттук драма театрынын актрисасы Мадина Талипбек жаратса, Кадичаны Элина Абай кызы аткарды.
Тасманы Өзбек кино улуттук агенттиги менен Кыргызстандын "Дан" продюсердик борбору биргелешип тартууда. Кыргыз, өзбек жана орус тилинде ушул жылдын соңунда жарыкка чыкмакчы.
"Делбирим" тасмасын тартуу иштери 25-июнда Ташкентте башталган. Кинонун сценарийин Керез Зарлыкова жазса, режиссерлук ишти өзбекстандык Сарвар Каримов алып барды.
Илияс менен Аселдин жаңыдан таанышып, жүз көрүшкөн учурундагы ирмем. Илиястын ролун белгилүү актер өзбекстандык актер Адиз Ражапов ойноду. Ал эми Кыргыз улуттук драма театрынын актрисасы Мадина Талипбек башкы каарман Аселдин ролун аткарды
Элина Абай кызы буга чейин эмне үчүн Аселдин ролун ойнобогонуна түшүндүрмө берген. Анда "Эмне үчүн Асел эмес? Анткени мен бир гана амплуада туруп калгым келбейт. Түрдүү, кызыктуу образдарды жаратып, өсүүнү каалайм. Менин потенциалым толугу менен ачыла элек. Көп нерсени үйрөнүшүм керек", — деп айткан
Кыргызстандык актрисалардын бул тасмага тартылышы коомчулукта терс пикир менен да коштолгон. Мындан улам Элина Абай кызы социалдык баракчасы аркылуу ошол эркектерге кайрылып, жалган патриот болбоого, элди бөлүп-жарбоого чакырган
