БИШКЕК, 4-авг. — Sputnik. Жалал-Абад облусунун Сузак районундагы Багыш айыл өкмөтүнүн аз камсыз болгон үй-бүлөлөрүнө күнөскана берилди. Бул тууралуу Sputnik Кыргызстан агенттигине Ош шаарындагы Россиянын башкы консулдугунун катчысы Николай Мещеряков билдирди.
Анын айтымында, аталган долбоорду ишке ашырууга 15 миллион сом бөлүнгөн. Максаты — айыл чарбаны өнүктүрүү менен жергиликтүү калктын жашоо-турмушун жакшыртуу болуп саналат.
Долбоордун алкагында аз камсыз болгон 150 үй-бүлө тандалып алынган. Анын 23үнө акысыз күнөскана берилсе, калгандарынын огороддоруна тамчылатып сугаруу системасы киргизилди. Күнөсканада жашылча-жемиш өстүрүү жана тамчылатып сугаруу боюнча окуу 2017-жылдын жаз айында башталган. Бул убакыт аралыгында жакыр жашагандар түшүмүнүн санын көбөйтө алышкан.
"Биз биринчи түшүмдү алдык. Эми базардан бадыраң, помидор сатып алып убара болбойбуз. Кошуна, туугандарыбызга да ооз тийгизгенге жетет. Атургай бадыраңдарды сатсакпы деп да турабыз. Буга чейин жашылчаларды огороддо эле өстүрчүбүз, көрсө күнөскананада өстүрүү кыйла жеңил экен", — деди Багыш айылынын тургуну Назира Жалалова.
Айыл өкмөт башчысы Райымбек Мырзабековдун айтымында, аз камсыз болгон үй-бүлөлөр бир жылдын ичинде мол түшүм алганын көрүп, айылдын көбү күнөскана жана тамчылатып сугарууга кызыгып калышкан.
"Биздин аймакта жети айыл бар. Баарында биригип 21 миң адам жашайт. Эгер алардын бардыгы бул кишилердей чарбасын өнүктүрсө биздин айыл башкаларга үлгү боло алат", — деди Мырзабеков.
Башкы консулдуктун өкүлү Николай Мещеряков Россия Кыргызстандын аймактарынын өнүгүшүнө дагы да жардам берерин кошумчалады.
Долбоорду ишке ашырууга БУУнун Айыл чарба жана азык-түлүк уюму көмөк көрсөткөн.
Эске салсак, 2018-жылды президент Сооронбай Жээнбеков Аймактарды өнүктүрүү жылы деп жарыялаган.
