БИШКЕК, 9-июл. — Sputnik. Каирдин соту Ливан мамлекетинин жараны Мона аль-Мазбухту жарыялаган видеосу үчүн 11 жылга соттогонун РИА Новости МЕНА маалымат агенттигине таянуу менен билдирди.
Аль-Мазбух буга чейин тараткан видеосунда египеттиктердин дарегине бир катар жаман сөздөрдү айткан болчу. Ал Каирге келген сайын жергиликтүү эркектер ага асыларын, жаман көздөрү менен карап ороңдой турганын билдирген. Бул нерсе өлкө тургундарынын маданияты жоктугун жана замандан артта калганын көрсөтүп турарын белгилеген. Кийин ал бул видеосун өчүрүп, жалпы египеттиктерден кечирим сураган.
Ага карабастан Мона аль-Мазбухтун видеосу Египетте нааразычылыктарды жараткан. Көпчүлүк жарандар аны жоопко тартып, соттоо керектигин айтып чыгышкан.
Ливандын жараны Башкы прокуратуранын буйругу менен 1-июнда Египеттен чыгып баратканда кармалган.
