БИШКЕК, 25-июн. — Sputnik. Казакстандын сенатынын эл аралык мамилелер, коргонуу жана коопсуздук комитетинин төрайымы Дарига Назарбаеванын кызы Венера турмушка чыкты. Бул тууралуу Sputnik Казакстан агенттиги жазып чыкты.
Өлкө президентинин небересинин жолдошу 22 жаштагы Дален Чайжунусов экени айтылууда.
Социалдык тармактарга жүктөлгөн сүрөттөргө караганда, үлпөт той Алматыдагы Ritz-Carlton отелинин залында өткөн. Бирок беш жылдыздуу отелдин өкүлдөрү маалыматты төгүндөп же ырастаган эмес.
Тойго Россия эстрадасынын жылдызы Филипп Киркоров жана казак артисти Кайрат Нуртас катышкан. Ошондой эле "Голос" долбоорунун катышуучусу Илья Юдичев дагы келген.
Венера Назарбаева 2000-жылы май айында төрөлгөн. Жаш курагына карабастан өзүн ар кайсы чөйрөдөсынап көргөн: "Алма-Ата, менин биринчи сүйүүм" аттуу ретро фестивалда ырдап, "Байконур" деген казак-орус-герман тасмасында роль жараткан.
Ал эми анын жолдошу тууралуу ачык булактарда маалымат жокко эсе. Анткен менен үй-бүлө мүчөсү Аллен Чайжунусов аттуу киши 2010-2012-жылдары "Самрук-Казына Контракт" компаниясынын жетекчиси, ошондой эле "ЭКСПО-2020 Дубай" дүйнөлүк көргөзмөсүндө Казакстан секциясынын генералдык комиссары болуп дайындалган.
