БИШКЕК, 18-апр. — Sputnik. Бишкектин мэри Албек Ибраимов шаар ичиндеги ири базарларды калаанын тышына чыгаруу үчүн жер жок экенин Жогорку Кеңештин жыйынында билдирди.
Төрага Дастан Жумабеков мэрдин буга чейинки "ири базарлар шаардын тышына чыгарылат" деген билдирүүсү канчалык жүйөлүү экенине кызыкты.
Ибраимов өз кезегинде базарларды чыгаруу үчүн биринчи кезекте өкмөт Аламүдүн жана Сокулук райондорунан атайын жер бөлүп бериши керектигин айтып, ошондо гана базарды көчүрүү мүмкүнчүлүгү болорун белгиледи.
"Азыр ири базарларды шаардын тышына чыгаруу үчүн жер жок. Өкмөт ошону чечип бериши керек. Аламүдүн жана Сокулук райондорунан атайын жер бөлүнсө, биз аны шаардын деталдуу планына кошуп кетебиз. Алдыдагы 4-5 жылда базарлар көчүрүлбөйт," — деди ал.
Калаа башчысы Ибраимов ошондой эле күйүп кеткен базардын ээлери менен жолугушуу болгонун, алар жабыркагандарга өз ордуларын берип, күйүп кеткен күркөлөрдү калыбына келтирүүгө кол кабыш кылабыз деп сөз бергенин айтты. Тийиштүү тараптар курулушка уруксат берсе эле калыбына келтирүү иштери башталарын кошумчалады.
"Мамлекеттик Экология техникалык инспекция териштирүүнү жыйынтыктап, курулушка уруксат берери менен иштер башталат", — деди мэр.
Белгилей кетсек, "Ош" базарынын аймагында жыл башынан бери үч жолу өрт чыккан. Акыркы жолу 13-апрелдин таңында өрттөнүп, 5400 чарчы метр жерди жалмаган. Өрттөн кийин соодагерлер "Ак үй" менен өкмөт үйүнүн алдына митингге чыгып, төрага жана премьер-министр менен жолугушкан.
