БИШКЕК, 12-апр. — Sputnik. Президент Сооронбай Жээнбеков Европарламенттин төрагасы Антонио Таяни менен жолукту. Бул тууралуу өлкө башчынын маалымат кызматынан кабарлашты.
Жолугушуу бүгүн, 12-апрелде мамлекет башчынын Брюсселге болгон иш сапарынын алкагында ишке ашты.
Жээнбеков менен Таяни негизинен Кыргызстан менен Европарламенттин кызматташуусун талкуулады. КР президенти Европа биримдиги менен болгон мамилени жакшыртуу өлкөнүн негизги максаттарынын бири экенин белгилеп өттү.
"Жээнбеков Кыргызстанда президенттик шайлоо заманбап технологияларды колдонуу менен өткөрүлүп, байкоочу кеңеш жакшы баасын бергенин айтты. Ошондой эле мамлекет башчы демократия, соттук система жана адам укуктарын өнүктүрүүнү улантарын кошумчалады", — деп айтылат маалыматта.
