БИШКЕК, 12-мар. — Sputnik. Жогорку Кеңештин депутаты Жанар Акаев өзүнүн Facebook тармагындагы баракчасына Кытайдын кайсы бир театрында кыргыздын улуттук оюндары сахналаштырылып көрсөтүлгөн видеону жүктөдү.
"Кытайда миңдеген чет элдиктер кызыгып келген чоң театрга кирсек, жарымдап калганда кыргыздын улуттук оюндары да программада камтылганы бизди абдан кубандырды. Театрдын чок ортосунан ат дүбүртү угулуп, кыз куумай башталганда көрүүчүлөр өзгөчө кубаттап турду", — деп жазды Акаев.
Видеодо сахнадагы экранда боз үйдүн турганын, анын алдында кош этек көйнөк кийген аялдарды жана ат минген ак калпакчан жигиттерди көрүүгө болот.
Бирок эл өкүлү окуя кайсы шаарда, кайсы театрда болуп жатканын, иш-чара эмне деп аталарын тактап жазган эмес.
Эске салсак, жыл башында Кытайда манасчы Жусуп Мамайдын варианты менен жазылган "Манас" эпосунун негизиндеги опера кытай тилинде экинчи ирет коюлган. Ага Кытай мамлекеттик театрларынын 100дөн ашуун артисти катышкан.
