ОШ, 12-мар. — Sputnik. Ош шаардык соту "Йакын Инкар" диний экстремисттик агымынын 9 мүчөсүн 3 жана 4 жылдан эркинен ажыратуу чечимин чыгарды. Бул тууралуу облустук милициянын маалымат катчысы Жеңиш Ашырбаев билдирди.
Анын айтымында, 9 жаран Кылмыш жаза кодексинин 299-беренесинин 2-3–бөлүктөрүндөгү кылмыш белгилери боюнча 3 жана 4 жылга эркиндигинен ажыратылып, сот залынан камакка алынды.
"Кыргызстандын аймагында ишмердүүлүгүн жүргүзүүгө тыюу салынган "Йакын Инкар" диний экстремисттик агымынын 16 мүчөcү 2017-жылы 15-июнда Кара-Суу районунда милиция кызматкерлери тарабынан кармалган. Алардын ичинен 9 жаран сот тарабынан эркинен ажыратылды. Ал эми дагы 7 жаранга карата тергөө иштери жүрүүдө", — деди Аширбаев.
Ал ошондой эле эркинен ажыратылгандар жазасын күчөтүлгөн тартиптеги түзөтүү абагында өтөй турганын кошумчалады.
"Йакын Инкар" кыймылы Кыргызстандын муфтияттын ишин тааныбай келгендиктен 2017-жылдын 15-июнунда ал агым экстремисттик деп табылып, Кыргызстандын аймагында ишмердүүлүгүн жүргүзүүгө тыюу салынган.
