Чыпалак баатырдын торпокту көтөрүп чапкан видеосу кайда, качан тартылганы аныкталды

БИШКЕК, 12-мар. — Sputnik. "Чыпалак баатыр" деген каймана ат менен таанылган Зарылбек Аликеновдун торпокту көтөрүп жерге ыргыткан видеосу социалдык тармактарда кызуу талкууга алынууда. Интернет колдонуучулары "атың чыкпаса жер өрттө болуптур. Байкуш торпокту өлтүрүп койду" деген таризде пикирлерди жазып жатышат.

Sputnik Кыргызстан агенттигинин кабарчысы "Чыпалак баатырдын" менеджери Мыктыбек Ашырбай уулу менен байланышканда ал окуя мындан үч жыл мурун Ысык-Ата районунун Шамшы айылында болгонун билдирди.

"Зарылбектин таекеси кайтыш болуп калып учурда ал айылда жүрөт. Видеодогу торпок анын жездесиники болчу. "Торпокту өлтүрүп, же бир жерин сындырып койду" деген сөз чындыкка дал келбейт. Көтөрүп ыргытканда жердеги саманга түшүп эч нерсе болгон эмес. Эки жылдан кийин ал малды ээси сатып жиберген. Бул видеону Зарылбекти каралагысы келген адамдар таратып жатат окшойт. Милиция дагы келип түшүнүк кат алып кетиптир", — деди Ашырбай уулу.

Чүй облустук милициянын маалымат кызматы аталган видео интернетке чыккандан кийин Ысык-Ата райондук милициясы окуя кайсы жерде болгонун аныктаганын билдирди.

"Аймактык тескөөчү Шамшы айылына барганда торпоктун ээси эч кимге доосу жок экенин айткан. Мындан сырткары, түшүндүрүү иштери жүргүзүлгөн", — деп билдирди маалымат кызмат.

Зарылбек Аликенов буга чейин чыпалагы менен автобус сүйрөп, мык ийип жана 24 килограммдык гиряны көтөргөн өнөрүн көрсөтүп берген.