БИШКЕК, 3-мар. — Sputnik. Борбор калаанын 12-кичи районунда жайгашкан №173 бала бакчанын жанында унаа коюп кеткен баланын буту сынып, №3 шаардык балдар клиникалык ооруканасында жатат. Бул туурасында Жол кыймылы коопсуздугун камсыздоо боюнча башкы башкармалыгынын маалымат кызматы кабарлады.
Билдирүүгө ылайык, баланы сүзүп кеткен айдоочу аны эжеси менен кошо ооруканага жеткирген.
“Toyota Avensis үлгүсүндөгү унаанын 38 жаштагы айдоочусу 12-кичи райондо №59 үйдүн жанынан 10 жаштагы баланы сүзүп кеткен. Кырсыктын кесепетинен баланын буту сынган. Айдоочунун айтымында, жолдун четинде турган бала унаага карай чуркап кеткен”, — деп билдиришти милициядан.
Ошондой эле айдоочунун соо экени аныкталган. Унаасы айып короого киргизилип, тергөө иштери жүрүп жатат.
