БИШКЕК, 6-фев. — Sputnik. Бажы кызматынын башчысынын мурдагы орун басары Райым Матраимов учурда үй-бүлөсү менен Бишкекте. Бул тууралуу Sputnik Кыргызстан агенттигинин кабарчысына анын агасы, Жогорку Кеңештин депутаты Искендер Матраимов бирдирди.
"Иним Кыргызстанда эле. Учурда эс алып, ден соолугун чыңдап жүрөт. Бир аптадай Ошто жүрүп, 2-3 күн мурда үй-бүлөсү менен Бишкекке учуп келди", — деди депутат.
Ал ошондой эле айрым ЖМКлар "Искендер Матраимов Бажы жетекчиси Кубанычбек Кулматовду "эрке бала" деп айтты" деп жазганы чындыкка коошпой турганын белгиледи.
"Мен Кулматовду "эрке бала" деп айткан эмесмин. Бул жерде жөн гана адашып жазып алышкан. Биз Кулматовду жакшы билебиз, ал бизди жакшы билет, бири-бирибизди сыйлайбыз. Иним Кулматовдун кол алдында иштеген. Экөөнүн мамилеси абдан жакшы", — деп түшүндүрдү эл өкүлү.
Ал эми бажы кирешесиндеги мындай чоң айырмачылыкты жөн гана бажынын кадыресе иши экенин айтып, буга былтыркы жылы Кытайдан оор жүк ташыган бир миң унаа ашыкча киргени менен байланыштырды.
Депутат азыркы абалды ашыкча саясатташтыруу деп баалап жатканын кошумчалады.
Матраимов 2015-2017-жылдар аралыгында Мамлекеттик бажы кызматынын жетекчисинин орун басары болуп иштеген. Өткөн жылдын 23-ноябрында премьер-министр Сапар Исаков "ишенимден чыкты" деген жүйө менен кызматынан бошоткон.
Ал эми Райымбек Матраимовдун 2016-жылкы декларациясына таянсак, жакын тууганы менен биргеликте 15 миллион сом тапкан.
