БИШКЕК, 2-фев. — Sputnik. Эгер адам коомдук транспортто жүрүүдөн уялса, бул анын адамдык сапаты кандай экенин көрсөтүп турат. Адам канчалык өйдөлөгөн сайын ошончо жөнөкөй болушу керек. Мындай пикирин өкмөт башчы Алматы шаарында Евразиялык өкмөттөр аралык кеңештин жыйыны аяктагандан кийин журналисттердин “айрым депутаттар маршруткада жүргөн кесиптештеринен уяларын айтышты, сиз эмнеден уяласыз?” деген суроосуна жооп берип жатып айтты.
Эске салсак, Жогорку Кеңештин 1-февралдагы жыйынында депутат Камчыбек Жолдошбаев маршруткада жүргөн депутаттардан уяларын билдирген.
Мындан улам коомдо депутаттын дарегине бир топ сын пикирлер айтылган.
“Көп нерседен уялам, мисалы адамга жамандык кылуудан. Ал эми коомдук транспортто жүрүүдөн уялбайм. Сен автобуска түшкөндө эл жаныңа келип, курчап алып пикирлерин билдирип турса жакшы да. Келечекте бийликтеги адамдар автобуста жүрсө, бул жетишкендик. Биз ошого баратабыз”, — деди өкмөт башчы.
Мындай учурда ал өзүнүн жөн эле жүрбөгөнүнө ынанып, ыраазы болуп каларын жашырган жок.
Белгилей кетсек, депутат Жолдошбаевдин пикиринен кийин бир катар депутаттар коомдук транспортто жүргөндө өзүн кандай сезерин айтып беришкен.
