ТЭЦ чыры боюнча аталган объектиге барып көчмө жыйын өткөргөн депутаттарга жасалган фуршет коомчулуктун кыжырын кайнатып жаткан кези. Бул туурасында социалдык тармакка пикирлер жазылып, эл өкүлдөрүнө сындар жаап жатканын көрүүгө болот.
Sputnik Кыргызстан элди кызыл чеке кылган фуршет туурасында аталган көчмө жыйынга барган депутаттардын бири Аида Касымалиевага байланышып, окуянын чоо-жайын сурады.
"Депутаттар тобу комитеттин көчмө жыйынын ТЭЦте өткөрдүк. Жыйын кечки саат төрттөрдө аяктап, сыртка чыгып баратып, жакшы жасалган стол кимге экенине кызыктым. Ал жерде турган формачан киши мени депутат деп ойлогон жок окшойт, "тиякка бар" деп эшикти көрсөттү. Кыязы, ал киши мени жөн эле журналист кыз деп ойлоду окшойт", — деп айтып берди Касымалиева.
Депутат кимдин чай ичкендигин өз көзү менен көрбөгөндүгүн, бирок дасторкон депутаттарга жасалгандыгын тастыктады.
"Биз — аял депутаттар Айнура Осмонова, Айсулуу Мамашова, Элвира Сурабалдиева болуп чогуу чыгып, мен андан ары жумуштарымды көздөй кеттим. Эркек депутаттар деле эшикке чыгып жатышкан, алардын калып, чай ичип жатканын көргөн жокмун. Бирок фуршет депутаттарга даярдалганы анык болуп калды. Негизи эле ушундай учурда фуршет даярдап, анан чай ичүү туура эмес да", — деди депутат.
30-январда Жогорку Кеңештин отун-энергетикалык комплекс жана жер казынасын пайдалануу боюнча комитеттин мүчөлөрү ТЭЦте көчмө жыйын өткөргөн. Ал эми парламент бул маселени 31-январдагы отурумунда карап, өкмөт башчысы Сапар Исаков депутаттардын алдына келип, абал тууралуу маалымат берген. ЖК бул маселени кароону бүгүн улантат.
