"Ар бир кесип ардактуу" дейт эмеспи. Кайсы тармак болбосун ар бир адам өзүнүн кесибин сүйүп иштейт. Анан бирөө келип эле үстүңө суу куюп жатса жаның кашаят да, туурабы?! Кээде бирөө менен таанышып калганда каякта иштериңди сурайт, аларга "журналистмин" десең эле балээге каласың. "Ушакчы турбайсыңбы! Тиги минтип койду, бул антип койду деп эле ар кимдин оозун аңдып отурасыңар" деп бир короо сөздү баштайт. "Жок, андай эмес мен ушак жазбайм, фактыларга таянып иштейм" десең да өзүнүкүн бербейт. Андан көрө "көп дөөрүбөчү" деп жаактан ары бир чапсаң батыраак басылат. Алардын ою боюнча кыларга ишибиз жок тияктан-бияктан укккандарыбызды көбүртүп-жабыртып жазып отурат экенбиз. Биздин деле башыбыз эки эмес да. Ким эле сот жообуна тартылгысы келсин. Ошол эле учурда экономикалык жана саясий иликтөөлөрдү, маданий жаңылыктарды жазсаң, кечирип кой, окушпайт. Ал эми "тиги ажырашты, тиги минтип койду, муну чаап кетти" деген сыяктуу "желтый" маалыматтарды баса калып окушат. Анан сулуу чымчык болуп "ушакчысыңар" дегенине күйөсүң да.
Эми жаңылыктарга өтөлү.
Кечээ Каракол шаарындагы массалык мушташтын видеосу тарады. Жаңжал ижарага лыжа берген жайлардын биринде кожоюндар менен белгисиз адамдардын ортосунда чыккан.
Кийинчерээк милиция Ысык-Көлдөгү массалык мушташка катышкандарды кармап, ал эми урушкандар эмне окуя болгонун айтып беришти.
"Аламүдүн" базарындагы мечиттен сумка уурдады делген киши видеого түшүп калган. Сумканын ичинде документтер, 30 миң сомдон ашык акча, ишинин жана үйүнүн ачкычы болгон.
Айттым эле го "коюп кетти, сабап кетти" деген жаңылыктарды баса калып окушат деп. Тээ Белоруссиянын Минск шаарында болгон окуяны Бишкекке чейин алып келип чуу көтөрө башташыптыр.
Кыргызстанда сиз курактуу канча киши жашай турганын билип алыңыз. Кызыгы жашында эркектер көп болсо, улгайган сайын саны суюлуп аялдардан азайып кетет экен.
Бороон-чапкындан Астанада аэропорт, көчө, мектептер жабылды. Көчөдө жүрсөңүз борошо учуруп кетейин дейт. Бул жакта Астанадагы аба ырайынын видеолору чогултулган.
Өлкөнүн көпчүлүк аймактарда бүгүн да кар жаай тургандыгы айтылды.
Валюта наркы. Сомдун баасы долларга карата орто эсеп менен 69. 29 (сатып алуу) жана 69.56 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгүсү 43.80 сом, АИ-92 үлгүсүндөгүсү 40.90 сом, ал эми дизель майы 40.40 сомдон сатылууда.
Соңку сөз. Ойноп сүйлөсөң да, ойлоп сүйлө!
Амандыгыңызды тилеп Эламан Карымшаков.
