БИШКЕК, 8-янв. — Sputnik. Чүй облусу менен Бишкектеги медреселердин окуучуларына жасалган сурамжылоого катышкандардын 70 пайызы светтик сабактардын медреседе өтүшүнө макул экендигин айтышкан. Аталган сурамжылоону Булан институту жүргүзүп, ага 87 бала катышкан.
Андан сырткары, окуучулардын канча бир тууган экендиги жана алардын ата-энесинин билим деңгээли тууралуу маалыматтар сунушталган.
Медреседе окуган балдардын, улан-кыздардын ата-энелеринин 60 пайызы орто билимдүү, 10 пайызы атайын орто, 30 пайызы жогорку билимдүү болуп чыккан.
"Үй-бүлөдө канча бир туугансың?" деген суроонун жыйынтыгы боюнча студенттердин 5 пайызы үч бир тууган, 15 пайызы — төрт, 45 пайызы — беш, 20 пайызы — алты, 10 пайызы — жети бир тууган экени маалым болду", — деп айтылат отчетто.
"Медресени аяктагандан кийинки планың кандай?" деген суроого 40 пайыз бала чет өлкөлөрдөн диний билимин улантууну, 25 пайызы дин жаатында (мечиттерде, медреселерде) иштөөнү, 5 пайызы дааватка чыгарын билдирген. Ал эми 30 пайызы жогорку окуу жайларына тапшырууну каалай турганын айткан.
Тынчтык инновациялары боюнча Булан институту – Кыргызстанда светтик жана диний билим берүү системасын реформалоо боюнча иш алып барган бейөкмөт уюм.
