БИШКЕК, 5-янв. — Sputnik. Кыргызстандын булуң-бурчундагы 70 бала президенттин атынан жаңы жылдык белек алышты. Бул тууралуу өлкө башчынын маалымат кызматы билдирди.
Жээнбековдун атына өлкө аймагынан 6-14 жаштагы балдардан кат келген. Алардын ичинде жакшы окугандар, активисттер жана аз камсыз болгон үй-бүлөнүн балдары бар.
Мисалы Баткен облусунун Кадамжай районундагы мектептин окуучу кызы президентке ыр менен кат жазып, ага компьютер белек кылуусун суранган.
Таластагы 9 жаштагы кыз алты жашынан бери "Манас" айтат. Ал дагы өлкө башчысынан белек күтөрүн айткан. Ушундай эле тилек менен Ысык-Көл облусунун Түп районунда 6-класста окуган окуучу кат жазган.
Жээнбеков президенттин билим берүү фондусунан балдарга планшет алуу үчүн акча бөлгөн.
