БИШКЕК, 21-дек. – Sputnik. Чеченстан бийлиги Сириядан россиялык 50гө чукул балдар менен аялдарды таап, эми аларды кайтарып келүү камын көрүүдө. Бул туурасында РИА Новости Чеченстандын Жакынкы Чыгыш жана Түндүк Африка өлкөлөрү боюнча өкүлү Зияд Сабсабиге шилтеме кылып кабарлады.
Шаршембиде Сабсаби Грозный шаарында ата-энеси Иракта курман болгон үч жашар Сафия Зайнукованы туугандарына өткөрүп берди. Кыздын тек-жайы Дагестандан экендиги айтылды.
"Эми Сирия багыты боюнча иштейбиз. Азырынча Ирактагыларды алып чыккан учурдагыдай маселе жарала элек. Сириядан 50гө чукул адамдан турган топту таптык. Жакынкы арада алардын аты-жөнүнүн тизмесин алабыз", — деди Сабсаби.
Ал табылган аялдар менен балдарды мекенине кайтаруунун мөөнөтүн так айтуу али эртелик кыларын айтты.
"Алардын качан алып келинерин эми убакыт көрсөтөт", — деп кошумчалаган Сабсаби.
Бул күнгө чейин чечен бийлигинин кийлигишүүсүнүн аркасында Ирак менен Сириядан мекенине 100гө чукул аялдар менен балдар кайтып келген. Алар Чеченстандын, Дагестандын, Ингушетиянын, Башкыртстандын, Твердин, андан сырткары Казакстан менен Өзбекстандын жашоочулары.
