БИШКЕК, 19-дек. — Sputnik. Вице-премьер министр Толкунбек Абдыгулов Улуттук банкты кайтадан башкармай болууда. Аталган кызматка талапкерлигин президент сунуштап, аны Жогорку Кеңештин экономикалык жана фискалдык саясат боюнча комитети бүгүнкү жыйынында карай турганын депутат Дастан Бекешев Sputnik Кыргызстан агенттигине билдирди.
"Улуттук банктын төрагасын президент сунуштайт. Биздин комитетке сунуш келди. Бүгүн карайбыз", — деди ал.
Улуттук банктын төрагасы Кубанычбек Кулматов Мамлекеттик бажы кызматынын жетекчилигине дайындалгандан бери анын орду бош калган.
Абдыгулов 2014-жылдан 2017-жылдын августуна чейин Улуттук банкты башкарып келген. 2017-жылдын августунан ноябрга чейин биринчи вице-премьер-министр, ал эми ноябрь айынан тарта вице-премьер-министр болуп келген.
