Алп манасчы Сагынбай Орозбаковдун 150 жылдыгына карата сынак өттү

БИШКЕК, 28-ноя. — Sputnik. Кочкор районунун Кара-Саз айылында улуу манасчы Сагынбай Орозбак уулунун 150 жылдыгына карата жаш манасчылардын кароо-сынагы өткөнүн "Саякбай манасчы" эл аралык коомдук фондусунун менеджери Азамат Нусупов билдирди.

Анын айтымында, конкурстун алкагында Нарын облустук "Манас таануу" интеллектуалдык таймашы да уюштурулган.

Иш-чара Жогорку Кеңештин аппарат жетекчиси Самат Ибраев, депутаттар Садык Шер-Нияз, Каныбек Иманалиев катышып, өкмөттүн Нарын облусундагы өкүлүнүн орун басары жана Кочкор районунун акиминин колдоосу менен уюштурулду.

"Салтанатты уюштурууда Сагынбай Орозбак уулу атындагы орто мектептин мугалимдер жамааты өзгөчө салым кошту. Жалпы 350 киши катышып жеңүүчүлөр аныкталды. "Манас таануу" интеллектуалдык таймашында Ат-Башы району 1-орун, Нарын району 2-орун, Ак-Талаа району 3-орунду багындырды. Манас айтуу багытында Кутман Садыбакасов 1-орун, Белек Бактыбеков 2-орун, Эрмек Нурдин уулу 3-орунду ээледи. Жеңүүчүлөр 70 миң сомдук атайы компьютерлер, планшеттер жана акчалай сыйлыктар менен сыйланды", — деди Нусупов.

Сынакка мейман катары келген бүгүнкү күндүн чоң манасчылары Назаркул Сейдракманов, Кубанычбек Алмабеков, Салимбай Турсунбаев, Алимбай Маатовдор президентке караштуу Мамлекеттик тил боюнча улуттук комиссиянын " Кыргыз тили" төш белгиси менен сыйланышкан.