БИШКЕК, 27-ноя. — Sputnik. Президент Сооронбай Жээнбеков премьер-министр Сапар Исаков, Жогорку Кеңештин төрагасы Дастанбек Жумабеков жана Жогорку соттун төрайымы Айнаш Токбаева менен жолукту. Бул тууралуу өлкө башчынын маалымат кызматы билдирди.
Ал өз сөзүндө Атамбаев бар күчүн жумшап өлкөгө туруктуулук орнотконун айтты.
"Бизден иштөө жана ар бирибиздин милдетибизди так аткаруу гана талап кылынат. Биздин милдет – Кыргызстанды өнүктүрүү, элдин жашоосун жакшыртуу, экономиканы көтөрүү, улуттук кызыкчылыктарды коргоо. Бийликтин бардык бутактарында коррупцияга каршы күрөшкө болгон күчүбүздү жумшоо", — деди президент.
Ал өз турмуштук жана аткаруу, мыйзам чыгаруучу бутактарындагы иш тажрыйбасын өлкөнү өнүктүрүүгө багыттоого даяр экенин эскертти.
"Жетиштүү иш тажрыйбамдан улам бардык бийлик бутактарына конструктивдүү иш-аракет жүргүзүүгө жардам берүүгө даярмын", — деди Жээнбеков.
Ал ошондой эле парламент аткаруучу бийликке бардык жагынан жардам берип, элге жана мамлекетке керектүү жана маанилүү долбоорлорду колдоп турушу керектигин белгиледи.
Пикир алмашуудан кийин мамлекет башчысы жакын арада ар бир бийлик бутагынын артыкчылыктуу маселелерин жана багыттарын терең талкуулоо үчүн өзүнчө жолугушуу өткөрүү ниетин билдирди.
