БИШКЕК, 27-ноя. — Sputnik. Сокулук райондук ички иштер бөлүмүнүн убактылуу кармоо жайынан качып кеткендер изделип жатат. Бул тууралуу ИИМдин маалымат кызматы билдирди.
Ага ылайык, окуя 27-ноябрда таңкы саат 6:00дөр чамасында болгон.
"Качып кеткен төрт киши карактоо жана адам өлтүрүү беренелери боюнча айыпталгандар. Учурда аларды издөө аракеттерине Чүй ОИИББдин жеке курамы жана ИИМдин ыкчам кызматы тартылды", — деп айтылат маалыматта.
Качкандар:
Базаркулов Рамиль Муктарбекович 38 жашта, Чүй облусунун Сокулук районунда төрөлгөн. "Киши өлтүрүү" беренеси боюнча кармалган.
Ачылдурдиев Багтият Турдукулович 32 жашта, Түркмөнстанда төрөлгөн. Кылмыш жаза кодексинин "Каракчылык", "Документтерди уурдоо, жок кылуу" жана "мүлктү атайылап жок кылуу же бүлдүрүү" беренеси боюнча айыпталып кармалган.
Дилдешов Бакыт Чыныбекович 38 жашта, Талас облусунда төрөлгөн. Каракчылык беренеси боюнча кармалган.
Жанботоев Кайрат Байызбекович 28 жашта, Чүй облусунда төрөлгөн. "Адам өлтүрүү" беренеси боюнча кармалган.
Алардын кайсы жерде болушу мүмкүндүгү боюнча Чүй менен Бишкектеги милициядан тышкары башка облустарга дагы маалымат берилген.
Милиция качып кеткен жарандар тууралуу кандайдыр бир маалымат билгендерди 0 312 43-88-91, 43-88-85, ИИМдин нөөмөт бөлүмү 0 312 662331 телефондору аркылуу кайрылууну суранат.
Аталган факты боюнча материалдар окуяга юридикалык баа берүү үчүн прокуратурага жиберилет.
