БИШКЕК, 25-ноя. — Sputnik. Кыргызстан менен Өзбекстандын аймактар аралык кызматташуу жөнүндөгү келишими күчүнө кирди. Бул тууралуу Sputnik Өзбекстан маалымат агенттиги билдирди.
Анда эки мамлекеттин чек арага жакын жайгашкан аймактарынын өкүлдөрүнүн квартал сайын жолугуп туруусу белгиленген.
Акыркы жылдары Кыргызстан менен Өзбекстандын мамилеси анчейин жакшы болгон эмес. Ага чек аралардын такталбаганы себеп болгон. 2014-жылдан бери эки мамлекеттин чек арасында курал колдонгон ондогон окуялар катталган.
Өзбекстанда бийлик алмашкандан бери эки өлкөнүн алакасы жанданган. 5-сентябрда Атамбаев менен Мирзиёев чек ара боюнча документке кол койгон. Ага ылайык, чек аранын 85 пайызы такталган. Мамлекет башчылары кол койгон документ октябрдын башында күчүнө кирген.
