БИШКЕК, 24-ноя. — Sputnik. Азия футбол конфедерациясынын беттеш уюштуруу комитети Кыргызстан менен Мьянманын болбой калган оюнунун датасын аныктады. Бул тууралуу КР Футбол федерациясынын вице-президенти Дастан Конокбаев билдирди.
Белгилей кетсек, Кыргызстан менен Мьянманын 4-сентябрда Бишкекте боло турчу таймашы оюнга бир күн калганда болбой калган. Мындай чечим КР өкмөтү тарабынан коопсуздукту сактоо жана Мьянмадагы абалдан улам кабыл алган.
Токио шаарында Азия футбол конфедерациясынын жыйыны өтүп, анда эки мамлекеттин беттешин 2018-жылдын 22-мартында нейтралдуу аянтта өткөрүү чечими чыккан.
"Комитет беттешти 2018-жылдын 22-мартына которуу чечимин кабыл алды. Бул боюнча биз дагы аракеттерди көрдүк", — деди Конокбаев.
Беттеш кайсы жерде өтө турганы кийин такталат.
